Jakob Gafner, Blausee-Mitholz
Em Jakob sis Läbe het am 21. April 1943 in Blausee-Mitholz agfange. Scho früeh het är s nid eifach gha: Won är isch vieri gsi, isch si Vatter gschtorbe. D Mueter het ume ghürate. Vili Halbgschwüschterti het är gha, drunter syner Brüeder Walter, Ruedi, Fritz und Hans und d Schwöschter Rosmarie. Uf em chlyne Buurebetrib vo sim Schtyfvatter hett dr Bueb scho früech tatchräftig mitghulfe.
Nach nün Jahr Schuel z Mitholz het är bir Firma Seebärger als Seilbahnmaschinischt gschaffet. Ja, für ds «Maschinele» het är es Gschpüri gha; das isch ihm gläge. Näre het är ganzi 34 Jahr lang – bis zu sir Pensionierig im Jahr 2008 – im Schteibruch z Mitholz gschaffet. Tag für Tag isch är mit em Pnöölader gfahre und het mit schwärschte Gräät hantiert. Glücklechi Tage, aber o schwäri Schicksalsschläg, Sorge und Ängscht het är erläbt. Am 4. Mai 1973 het är ds Vreni Kallen ghürate. Ds Ehepaar het schöni Tage zäme erläbt, aber bald scho het ds Vreni unter körperleche Gebräche glitte und isch hüüfig im Spital gsi. Für das er ins het chönne umeschoffiere, het är no schpät glehrt Outo fahre. Doch am 27. Juli 1989 isch ds Vreni gschtorbe, und dr Jakob isch scho im Alter vo 46 Witwer worde.
Näbscht schöne Begägnige het dr Jakob o Verletzige und Enttüschige müesse ertrage, glichzytig aber ou dörfe Liebi empfah und Fründschafte gniesse. Im Septämber 1990 het er d Regula Bärtsch lehre kenne, und es Jahr später isch si zu ihm nach Mitholz zoge. Zäme hii si 28 Jahr chönne verbringe. Si si sogar mitenang uf Öschtriich i d Ferie.
Dr Jakob isch e lideschaftleche Holzer gsi. Er het – mit Hilf vo dr Regula Bärtsch – vil Holz gfreeset u gschpaute und als Brönnholz verchouft. Überhoupt isch dr Jakob sehr gärn im Wald und i dr Natur gsi, het e Hang zu de Tier gha, bsunders zu de Hünd. Nid weniger als drü het er gha. Drbi isch er ender e Einzelgänger gsi, und het zrüggzoge gläbt.
Dr Jakob het gärn gjasset u sech für Sport interessiert, sigs Formel 1, Töfffahre – vor auem dr Tom Lüthi hets ihm aata gha – oder für ds Schutte. Är isch e grosse YB-Fan gsi und het zäme mit em Chrigel Trachsel gar mänge Match im Bärner Wankdorfstadion bsuecht. Ja, er het ds Schutte sogar am Tanze vorzoge. Und bis zletscht het er di sportleche Ereigniss am Fernseh mit Interässe mitverfolgt. Am 16. Septämber het är d Ouge für gäng zueta.
