Dr Paul Schranz isch am 5. Dezember 1946 als vierts Chind vom Peter u dr Maria Schranz-Wyssen gebore. Mit syne 10 Gschwischterte isch är im troute Familiekreis ufgwachse.
D Schuel het Paul im Elsigbach bsuecht. Im 5. u 6. Schueljahr isch är im Achsetbärg bim Schmid Robi Statterbueb gsy. Im Jahr 1963 isch Paul mit sym Brueder Edi am Achsetbärg z Bärg gange, im Herbscht druf het är für drü Jahr bi Schmid Alfred gholfe bure.
Als 20-Jährige het är de ä nüji Stell bim Jungen Albert u dr Hermine aagfange, speter het är de bir Familie vom Fritz u dr Marianne Jungen dörfe würke.
Är het menge schöne Summer uf dr Alp a Ueschine verbracht. Bsunders ds Zügle u ds Gloggeglüt sy syni grossi Früüd gsy! O d Familie het ihm bsunders viel bedütet. Speter de het Paul mit dr Familie Jungen i Jura dörfe ga, dert isch är sehr gärn gsy.
Wo dr Betrieb i die dritti Generation ubergange isch, het är o bir Familie vom Urs dörfe blybe. Ihri sächs Buebe het är bsunders gärn ka.
I syre Fryzyt isch Paul gärn uf sys Töffli gstige u a Elsige ga schifahre.
Zytewys het är i ds Wallis oder im Kröschebrunne chöne ga ushälfe, das het ihm ging umi ä gueti Abwächslig gä.
Eb de syner Chräft hii naglah, het Paul no füf Summer bi sym Brueder Walter u dr Marie am Achsetbärg mitgholfe.
Paul isch afe chli müed worde u het dr Wunsch nare Verenderig güsseret u är het im Dienschtbotehiim Oeschberg äs Plätzi gfunde. Na sächs Jahr het sig sy Gsundhiitszuestand zuesehends verschlächteret u är het ds Frutige i ds Altershiim dörfe yträte.
Erstunligerwys het är sich dert no gly iis erholt u da het är no drü Jahr bi gueter Gsundhiit dörfe derby sy.
Am 23. Juli 2024 isch es ihm bim Gärtele ned wohl gsy. Paul het sofort Hilf ubercho u är het sich no bi de Pflegende chöne bedanke für ihri Müei u isch de churz druf friedlich ygschlafe.
Paul het sich ging gwünscht, dass, we är de mues ga, aller i däm Jahr zum Zügle ds Glüt aalege. Ds Gloggeglüt het är gliebt u äs isch ihm so wichtig gsy.
ACHSETE, IM JULI 2024
DI AGHÖRIGE
