Kommunischtä u Kolumnischtä
«Klar, i bi parat fürä Klassäkampf!»
«Ned als Kommunischtä hi si üüs agfragt, Gian. Als KOLUMNISCHTÄ wisi üüs zwee!»
Als Kolumne-Rookies und Frutigtaler-Chauvinischtä haltä mir üüs natürlig a d Vorgabä und stelle üüs gägäsitig churz vor:
Im (extrem) linggä Eggä hiimer dr Tino: Dr vielbeschäftigt und talentiert bilingue Podcastmoderator vo dä Mulaffä, Jus-Absolvent, Kanderkulturjurischt und langjehrig Spieler (churz ehemalig, het aber scho wieder sis Comeback gä) vom EHC Kanderstäg. Iz also o no Kolumnischt. Tino gseht us wie nä grossä, liebä K uschelbär, wo niemerem öppis z liid tuet. Es sei denn, ier läset d`Exkremänt vo öiem Vierbeiner ned uf. De chas nämlich durchuus sii, dass ufdsmal a grossä Schatte hinder öich uftoucht und Tino uf sine Rollerblades (über 2 Meter gross) drhärchunnt und nech «höflech» bittet, dä doch ufzruume. Plottwist: Es spilt ihm ki Role, öb ier es Robidogseckli derby hiit oder ned…
I bi froh, sonä humorvollä und talentiertä Mitschriber a mire Siitä z ha, und fröiä mi, öich mit üsnä Churztextä über Gott und ds Frutigland z underhaltä.
Im (weniger) linggä Eggä, mitem Abu-Chaker-Haarschnitt dr Cribwalk tanzend: dr Gian-Andrea. Dr übertribä bruunbrennt Adelbodner Technologiejunkie, Familiävater, Ronaldinho-Idoliker und brättspielsüchtig ex-Pädagog und aktuelle Gmeinds-Muni gseht ds Glas immer wie sini Unterhosä nach der Magedarmgrippä: halbvoll.
Dr Gian isch dä Typ Mensch, wo sech ufgrund vo sinere körperleche Unterlägehiit (Adelbodner Genpool) sit jehär dank sim grenzwärtigä Humor het chönnä am Läbä bhaltä. Är isch sit sirä Jugend e Verfächter vor Alternativmedizin (ned Globuli: da wiss jedä, dasses Bullshit* isch). Wo anderi Menschä Antimykotika brüchte, nimmt är es Nature-Joghurt z’hilf: Nützts nüd, so schads nüd!
Als Fründ isch är loyal, hilfsbereit und unerschütterlich. Dr Gian isch immer für sini Lüt da.
Weni jemals ä Liichä z’vergrabe ha, de isch är dr Erscht, woni bruchä. Ned nume, will mä ihn im Dunklä ned guet gseht, sondern o wil sini Antwort würd si: «I bringe d’Schuflä, Tino. Wo wiimer dä Siech ga vergrabä?»
Mier zwe si zäme dr Mulaffä Podcast. Und wie im Podcast si üsi Ussagä mit Vorsicht zgniessä – mä chönnts o Satire nennä. Die miischtä Sachä si wienä Orgasmus im Porno: chli übertribe und ned huere ärnscht gmiint.
Zu gueter Letscht ä liebe Gruess a dorfältischt Schpissner: Da är dr Inzigscht isch, wo cha läsä und es «Frutigländer»- Abo het, wird bir nächschte Stammesversammlig üsä Text vo ihm vorgläsä und sicher viel Aklang findä. Dä Text isch übrigens uf CH-Dütsch gschribe (gsii): Entweder chunter so wiener isch, oder aber d Redaktion hets bereits beröit, üs zwee als Kolumnischte azfragä…
(Anmerkung der Redaktion: Ach was, kein bisschen. Nur weiter so!)
SCHÖNS WUCHENEND U BIS GLI GIAN & TINO – MULAFFÄ PODCAST
* Munigagel
** Perfektpartizip vom Wort «chergge», das so viel bedüttet wie «in unsympathischem Sinn und intensiv necken, ärgern»
