NACHRUF

Am 18. September 1942 isch ds Esthi im Lischehuus gebore worde. Mit sine 14 Gschwisterte het äs e Chindhiit voll Liebi u Geborgehiit dörfe erläbe. Wan es isch zwölfjehrig gsi, isch si Vater gstorbe. Alli si itz gforderet gsi, ds Muetti z unterstütze, dr chli Buurebetrib witerzfüere. Na dr Schuelziit isch ds Esthi drum o e Ziitlang dahime blibe u het gholfe. Nach eme Wältschlandufenthalt het äs e Neikurs bsuecht. Speter het äs uf dr Fuhre bim Fredi Oester im Lädeli gschaffet.
Im Herbst 1966 het ds Esthi dr Brieftreger Fritz Büschle vo Hirzbode ghürate. Im Jahr druf hi si dr Simon übercho. Na dis na isch d Familie grösser worde: d Christine, dr Hansjürg, dr Fritz, dr Adrian, d Marianne u d Barbara si drzuegstosse. Im Luuf vor Ziit het d Familie ids Buurehuus züglet u dr Buurebetriib übernoh. D Zyt im Früehlig u Herbscht im Wydli si für ds Muetti öppis ganz Bsunders gsi. Ds Füüre u Choche, ds Muutschne uf em Holzhärd u das schlichta ifacha Läbe hi ima ging ganz bsunders guet gfalle. Als Usglich bi der grosse Arbiitslascht isch es viil gäge Bunder, im Winter mit dä Tuureschi u im Summer mit de Wanderschueh, mengsmal o i Beglitig vo sine liebe Fründe. Ds Uftanke ir Natur u sis Vertruwe zum Vater im Himmel, hi ihnes o grad dür di schwirige Zyte düritrit. Speter hi üser Eltere dr Buurebetriib em Fritz übergaäh u si umi zrugg ids Chalet züglet. Mit viil Liebi het ds Muetti da sini Blüemeni pflegt, i sim Gärtli gchräbelet, de Bibeni gugget u het o gäre gholfe höue.
Unerwartet tifig isch vor 12 Jahre ds Dätti gstorbe. D Umstellig vore läbhafte Grossfamilie zunere leere Wohnig isch für ds Muetti nät ifach gsi, es het sig drum o ging gfröit über es Bsüechli vo de Grosschind.
Am Abe vom 24. Oktober 2017 het es plötzlich ki Chraft meh i de Bii gha. Trotz sofortiger Hilf u mene Heliflug ids Inselspital, isch ds Muetti nare Hirnbluetig nie meh erwacht. U so hi wir i grosser Liebi u Dankbarkiit am 31. Oktober ds Muetti müesse la gah.