D Elsbeth Lauber-Schmid isch am 18. September 1951 im Huus vo irne Grosselterä im Helgisbärg uf d Wält cho. Si isch di eltischti vo sächs Töchterä vom Fritz und dr Marie Schmid gsi. Iri Eltere hi lang a Üblebärg gwohnt. Wo si id Schuel isch cho, isch si albe bi de Grosselterä im Helgisbärg gsi. Di erschtä Schuljahr isch si im Oberfäld id Schul. Di letschtä Schueljahr im Dorf, wo si het chönnä bi dä Eltere a dr Wachmeischtergass sy.
Im Oktober 1968 bis zum Februar 1969 het sy d Hondrichschuel bsuecht. I dere Zyt het si dr Eduard Lauber lehre kenne. Drna isch si zu ihm und synere Familie i ds Kirchgmeindhuus Frutigä züglet. 1969 hy si ghüratä. Si hi sibe Chind übercho. Bis 1977 sy si gmysam dert gsi. Bis ds Huus ar Hohlegassä isch fertig gsi, sy si bis 1978 a Acherä gwohnt. Vo 1989 bis 2015 het syä im Gwärbschuelhuus putzt.
E grossä Schicksalsschlag het si im September 1991 erlitte, wo ire Ma, dr lieb «Edel», i dr Wyd plötzlich amä Härzvrsägä gschtorbä isch. So isch si im Alter vo 40i verwitwet gsi. Mit 41 isch d Elsbeth zum erschte Mal Grosi worde. Si het mit em Ruedi Reichen e wärtvolli Stützi und Liebi a iri Sytä übercho. D Chind hi ghüratä. 20 Grosschind u 6 Urgrosschind het si dörfä ha.
Syt em Jahr 2000 isch si mit em Ruedi a Golitsche z Bärg, wo ire liebscht Ort isch gsi. Ab em Summer 2007 isch si de mit em Peter und dr Deborah z Bärg. 20 Summer lang het syä kesset. Wenn si oben isch gsi, het si albä gsit: «I ha Wienachte.» I de letschte Jahr isch si de mit em Helikopter z Bärg. Iri Händ het si niä chönne schtill ha, wenn net mit Arbeit, den mit Lismä.
Si isch im Samariterverein Kandergrund gsy. Mit em Ruedi zäme het si gärn Usflüg gmacht. So isch d Nacht vom 28. Januar 2020 cho, wo si dahimä für immer iri Uge gschlossä het – ganz fridlech und völlig unerwartet a Härzversägä. Mir wärdä d Elsbeth, üses Mueti, Schwiegermueti, Grosi u Urgrosi im Härzä bhalte u a iri Schterchi denkä, wo si het gha u a üs het witergäh: «Dr Herrgott git dir nume so nä schwerä Rucksack, wie d magsch tragä.»