Dr Wilhälm isch am 22. September 1927 im Rinderwald uf äm Gibeli geborä worde. Är isch mit sibe Gschwischtärtä im Rinderwald ufgwagsä, dr Wilhälm isch dr Eltischt gsi vo allnä.
Si Muetter isch verstorbä, wo är ersch sibejehrig isch gsi. Somit het är scho ganz jung müessä Verantwortig übernäh.
Dr Wilhälm isch nün Jahr im Rinderwald id Schuel. Är het verzelt, dass dr Schuelwäg im Winter mengisch sehr streng sigi gsi, will dr Schnee mengisch meterhöi sigi gsi.
Z Unterwisig het är uf Frutigä usä müessä – wohlverstandä bed Wäg lufä.
Wil si Vater ä transportablä Sitägatter het ka, het är nar Schuelzyt uf däm Gatter mengi Hüttä gsaget, so wiä o diä zwo Hüttä a Eggärlä og. Dert opnä isch är ging gärn gsi.
Inisch het är verzelt, si higä im Winter näbter Sagi äs Füür gmacht für ä warmi Suppä Zmittag z machä. Aber ni, äs het duä a ki Suppä gä, wil dr Schnee vor Tannä sigi achä kit u higi ds Füür glöscht.
1951 het dr Wilhälm mit äm Brueder Chrischtä d Sagi uf äm Telläfäld chönä vo dä Brüeder Kammer chufä. Är isch mit Lib us Seel ä vorbildhaftä Sager u Gschäftsma gsi. Für ihn isch ging ganz wichtig gsi, dass d Lüt grächt behandlet wärdä. Ds Rundholz izchufä isch ihm ging z Liebschtä gsi. So het är mit Ryter Ueli am Fahrä Bärgli ä grossä Rundholzschlag organisiert, wo mä het müässä mit äm Helikopter flügä. Aller Söhn himä wellä bibringä, dass das doch net chöni rentierä. Aber wiä Wilhälm isch gsi: Är hets trotzdäm gmacht. D Feschtstellig, dass das Holz vo dert vom Schönschtä sigi gsi, wo si uf äm Telläfäld hi gsaget, het si Durchhaltäwillä beschtätigt.
Das dr Grosssohn Iwan wot d Sagi witerführä, het ihnä ging umi zuäversichtilich gstimmt u äs het ihm grossi Früd gmacht.
1950 het dr Wilhälm di liebi Frou Frieda ghüratä. Ihnä si vier Chind gschenkt wordä. Leider isch z Nelly vor sächs Jahr gstorbä, was für üs aller u vorallem aber für Muetter u Vater ä trurigä Schicksalsschlag isch gsi.
Siner 9 Grosskind u 13 Urgrosskind si ihm ging am Härzä glägä.
Üsä Vater Wilhälm isch trotz viel Arbit ging ä liebä u fürsorglichä Mensch gsi, sini liebi u positivi Art wärdä mir aller vermissä.
Dr Glubä a Gott het ihm og ging umi Chraft gä, är isch gärn am Sunntig id Kapällä zur EMK z Predig.
Dr Wilhälm het bis itz höiä Alter ä gueti Gsundhit ka, so isch är wit über 80 gsi, wo är zerscht mal i sim Läbä i ds Spital het müässä.
I letschter Zyt het är duä äs paar mal ä Lungäentzündig ka, was ihnä du ging me gschwecht het.
Bis im November het är mit dr Muetter dank Spitex ur Hilf vor Familiä dörfä uf dr Sagi läbä.
Am 23. Januar, i sim 93 Läbesjahr, het är duä fridlech dörfä ischlafä.