Am 2. Dezember 1939 isch a Ried ds Rösi Trachsel-Steiner uf d Wält cho. Äs isch als erschts Chind vo Lydia u Johann Steiner–Schmid gebore worde, u sibe witeri si im Luuf vo dä Jahr no drzuä cho. Äs ifachs Läbä isches gsi i därä chinderrichä Familiä.
1955 isches us dr Schuel cho u ir EMK konfirmiert wordä. Si gross Wunsch weris gsi, Chrankäschwester z lernä. I därä Zyt isch das aber leider ned müglech gsi, u so het äs sech bsunders gfröit, wo äs im Spital z Frutigä het ä Stell übercho u dert het chönä ga schaffä.
1961 het ds Rösi am Hans Trachsel ds Ja-Wort gä. Si si Elterä vo vier Chind wordä. Nachem Paul si ds Vreni, d Nell u d Brigitte uf d Wält cho. Für ihri Chind het ds Rösi vil Chlider mit ihrem handwärklechä Gschick sälber glismet oder gnäit.
1975 het di sächschöpfegi Familiä id Buumgartästrass ids igetä Hiim chönä züglä, wo si vil Platz unä schönä Gartä hi ka.
Speter, wo d Chind si usgflogä, het äs im Denner chönä ga schaffä, u das isch für ds Rösi ä willkommeni Abwägslig gsi.
1985 het äs sech mit sim Maa Hans ä grossä Truum erfüllt: Si si zämä uf Kanada zur Schwester Emmy.
1988 isch ds erschtä Grosschind uf d Wält cho, u im Verluuf vo dä Jahr si no füf witer drzuä cho. Äs het sech ging für ds Läbä vo dä Grosschind interessiert u für aller ging äs offnigs Ohr ka. Zuägsetzt hetmä 2003, dass zersch ihri Muetter, d Schwägeri, dr Schwiegersohn unä Neffe gstorbä si. 2007 hets när ono ihrä Maa, dr Hans, verlorä.
Ds Rösi isch sehr ä gsellegi Frou gsi. Ob im Hiimbund, ir Frouäturngruppä oder bi verschidnigä friwilligä Arbitä, unter anderem im Pflegehiim Frutigland, het äs gärn mit apackt.
2010 isches mit sinä Schwesterä Klärä ur Heidä uf Kanada ga ds Emmy bsuechä.
Früüd hets ka, wos 2019 zrugg a ihres Plätzi ids nüiä, umbutä Huus vomenä Grosschind het chönä züglä.
Leider het äs sis nüiä Dahiimä nemme lang chönä gniessä. Zimlech schnäll hi ihns d Chräft ging wi meh verlah, sodass äs di letschtä drü Wuchi nemme inzig het chönä si. Am Rösi si grösst Wunsch, bis zletscht chönä Dahiimä z blibä, isch numä dank sinä drü Mitscheni müglech gsi.
Si his Tag u Nacht fürsorglech u liebevoll umsorgt u hi probiert, ihm no jedä Wunsch, wo ihnä isch müglech gsi, z erfüllä. Am Zischitgmorgä, 21. Juli, isch äs vo sim Lidä erlöst wordä.