Im Jahr 1955 isch ds Hanni am 5. Oktober gebore. Ds Zwüscheflüeh isch si ufgwachse mit drü Brüeder u zwöi Schwöschtere, si het e schöni, aber strängi Chindhiit gha. Si hii buuret u drzue e Alp bewirtschaftet, das het huufe Arbit gä, u da isch jedi Mithilf gfragt gsy, scho i junge Jahr. Ds Hanni isch intelligent gsy u het ir Schuel de andere ir Klass bi de Ufgabe chönne hälfe, um di Understützig sy d Lehrer aube froh gsy.

Nach dr Schuelzyt isch ds Hanni es Jahr i ds Welsche, drufache het si d Lehr als Chöchin im «Boumgarte» z Aeschi gmacht. Dert hii sech d Wäge vo Kobi u Hanni ds erste Mal krüzt, si hii sech lehre kenne u gärn übercho. I dere Zyt ds Aeschi sy o ganz gueti Fründschafte zu de Arbiitskolleginne entstande, wo no lang Bestand hii gha.

Ir Chiuche z Diemtige hii sech ds Hanni u dr Kobi 1975 ds Ja-Wort gä. Zwöi Jahr später isch dr Peter u im 1980 dr Hansjakob uf d Wält cho. Ds Hanni isch de beide Söhn e liebi Muetter gsy, es guets Vorbild i vilem. Si isch für ander Lüt e grossi «ChummerzHilf» gsy, engagiert u verständnisvoll, so isch si für Familie, für Fründe u für mänge Verein e wärtvolli Stützi gsy.

Ar Site vo Kobi senior het si alls ta wo nötig. Wes isch gange, isch si mit uf Besamigstour u het de mängsmal im Winter müesse hälfe, ds Outo freizschufle, wiu d Wäge zu de Höf dennzumal no ygschneit gsy sy. Si isch o für die schriftleche Arbiite zueständig gsy, äbeso bir Brennereiufsichtsstell u bir Vehversicherigskasse Spiez, wo si über 20 Jahr ds Amt als Kassieri het innegha.

Ar Schafzucht het ds Hanni meh u meh Interesse übercho, o da hii si als Team guet zäme gutschiert. Mit grossem Ysatz het ds Hanni ghulfe, bire schwierige Geburt oder we si es schwachs Lämmli ufzoge hii. Di gmeinsame Zyte uf dr Schafalp ob Leissige si unvergässlech. Wie viel schöni Stund hii si dert mit dr Familie u Fründe dörfe erläbe! Im Vorstand vo de Oberländer Landfroue u im Froueverein Hondrich isch ds Hanni mängs Jahr Mitglied gsy. Si het sogar e Urkund als Ehremitglied übercho. A de Vereinsaläss wie em Buurezmorge, em Altersnamittag im Schuelhuus u em Mittagstisch ir Hondrichstube, da isch ds Hanni für ds lybleche Wohl besorgt gsy, si het kochet u bache u es het geng gnue gha. I dere Zämearbiit sy viel fründschaftlechi Kontakte entstande.

Wo dr Kobi senior pensioniert isch worde, hii di beide dr Sohn Peter u di jungi Familie ufem landwirtschaftleche Betrieb wyterhin unterstützt. Uf dr Höhematte hii si gluegt, dass es em Jungvieh guet giit u ir Heu- u Ämdizyt isch me dankbar gsy um jedi Hilf bim Zämemache u Ytue.

Gwohnt hii di beide ab 2011 im umboute Stöckli. So het ds Hanni immer no d Nöchi zu de Grosschind voll u ganz chönne gniesse. Sie het beidi Familie mit Hüete understützt u mit Nick, Tom, em Lio und er Camille viel Schöns zäme erläbt. Fürsorglech u liebevoll isch si gsy. Ds Hanni het da u dert, sigs bim Choche, ir Huuswirtschaft oder im Garte, mitemne guete Rat zur Syte chönne sta. Mit Verständnis isch si uf d Lüt zue u het ds Guete im Läbe i Vordergrund gno.

Du hast gesorgt, du hast geschafft, bis dir die Krankheit nahm die Kraft. Schlicht und einfach war dein Leben, treu und fleissig deine Hand, immer helfend für die Deinen, du wirst fehlen, hab tausend Dank.