Schön, simer immerhin no Brieffründä. Schomal vorwäg ganz liebi Grüess a aller wo die Kolumnä läsä und sicher ki Plan meh hii, was du mier hie am 1. April 2025 gschribe hesch. E nu so de.

Bezüglich am Schuss ids igetä Bii wägem Bärndütsch schribe: Da ig mier ki Pischärä wott zuechi tuä, im Gägäsatz zu dir, bini glub safe. Dä Punkt mit dr künschtligä Intelligenz wägem Bärndütsch schribe gibider, aber bir Rächtschribig himer ä Trumpf (wo kein Kläger, da kein Richter).

Dini String-Theorie hetmi interessant ducht, ischmer aber chli ds höch gsi. Schlussendlig bini das Züg ga google, bi aber ufere Siite glandet (woni vorhär no ned ha kennt), wo ä hübschi Frou dr String ned lang het anne gha und d Theorie derhinder hetsi o ned erklärt…

Item. I bi due noch chli uf därä Siite verwiilet, und da hetsig bi mier plötzlich o ä iigeti Theorie bildet: Was weri, weni plötzlich dig da druffe würdi finde? Theoretisch würdi di gseh i däm Segment. Du bisch ned nume guetussehend (3-fach usziichnete «most handsome Hockeyplayer»* vor 2. Liga), sondern o sehr gschid und vielsitig! I ha dini Rollenä im innere Uug scho gseh: Tino dr Lehrer, wo Nachhilfe Unterricht git und o mal unkonventionelli Lerntechnike awendet. Tino dr Sanitärler, kis Loch, woner ned entstopft. Tino dr Pizzalieferant, ned nume dr Mozzarella isch gschmolze woner ar Türe glüte het. Tino dr Handlanger ufem Bou, wo a meh als nume under d Armä griift… Dis Potenzial weri enorm!

Sorry, i bi abgschweifft, zrugg zu mire sälber gstelltä Frag: Wie würdi reagiere? Inersits weri totschwigä ä ifachi Lösig. Du gisch wiiterhin dinä x-verschiedene Brüef nachi (iz isch bi mier langsam o ds Füfi achi, warum üsi Podcast-Zuehörerinne u Zuehörer nach wie vor ki Plan hi, was du gnau büglisch) und i frage di wiiterhin ned, wies gad brueflig usgseht bi dir.

Oder i spriche di druf a, ihr Hoffnig ufne offenä und interessante Dialog aber mitmä gwüssä Räschtrisiko, dass:
- es dir Pinlech isch.
- häbligä wirsch.
- gad performsch.
- ig ufdsmal o mitmache.

Mini Gedankä hi sig meh dreit als dr Grind vomene Metalhead nach 3 Stund Headbängä** amene Konzärt, ä richitgä Fiebertruum isch das gsi! Zum Glück hani mi a Mani Matter zrugg bsinnet: Ds Zundhölzli hani gar nie vom Teppich müessä wägnäh, es het ja ned mal brennt gha, ja, geschweige de existiert!

Völlig erschöpft hani die Siite gschlosse und bi ids Bett kit. I bi froh gsi, dassi ar Mereditha – Usschnitt vo Tino sim Brief vom 01.04.2025: «SUCHST DU TROST AUF OFFENE FRAGEN? RUF MEREDITHA AN (4.50 / Minute)» – nümme ha müesse alüte, die Miitä het i de letschtä Monet guet gläbt dank mier… Wie o immer, dä Stress tuenimer ned nomal ah, ds nägstä Mal schribemer umi zämä die Kolumnä.

I wünsche dir ä gueti Nacht Bruder (isch iz irgendwie sones nüis Socialmedia***- Ding, sine Kollegä adslütä und das z sägä, aber das beredemer de mal im Podcast) und bis gli.

LG, hdog Gian

GIAN UND TINO – MULAFFÄ-PODCAST

*es hübsches Grüfi
**ä Metallchopf wo sig uhimlig schnäll zum Takt vor Musig uf und ab bewegt.
***gar ned mal so soziali Mediä

Anmerkung Redaktion:
In der Kolumne schreibt Gian einen Brief an Tino, der seinerseit einen in der Kolumne der Ausgabe 25 verfasst hat. Der Brief wurde nicht lektoriert.

GIAN ANDREA SCHRANZ UND TINO WANDFLUH

MULAFFÄ

WWW.MULAFFÄ.CH

REDAKTION@FRUTIGLAENDER.CH

Kolumne – GCHERGGET

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title