Am 13. Herbtschtmonet 1925 isch dr Gödi im Tellefäld uf d Wält cho. Siner Elterä, Schneider Gottlieb u d Hermine geb. Stoller, hi denn scho 2 Miitleni u äs Büebi ka. Di vier Chind hi dörfä glücklich zämä ufwagsä. Id Schuel si si vom Tellefäld a Rinisch uehi gangä.

Nach em Schuelustritt isch Godi i Aargau uf Strengelbach inä guet gfüehrtä Buurebetrieb, wo är ä rächti Usbildig het übercho, für ä guete Buur z wärdä. I däm trochenä Summer 47 isch är z Andermatt 17 Wuchä i dr Regruteschuel gsi. Zrugg uf em elterligä Betrib, het är braf mitgholfä. Ds reine Simmentaler Veh isch ihm scho denn fescht am Härz glägä.

Gwiidet u gsümmeret hi si a Wyssematti. Ä Strass isch denn no ä kini gsi u ma het no allz vo Hand gmacht. Inzig z Mulltier «Franz» het uf sim Buggel ä hufä Laschte uehi tragä. U nachem Franz het Godi äs jungs schöns Fribärger Rössli kuft u sälber zum zieh u paschtä usbildet u mängisch am Sunntig ä chlinä Usritt gmacht. Ja die gueti «Züsä» het doch nie äs Fuedär la stah.

Im Früehlig 1955 hi d Hochzitsgloggä glütet u er het d Erika Stoller vom Chandergrund g’hürätä. Mit dä Jahrä sinä 8 Chind gschenkt wordä. Im Jahr 56 Marianne, 58 Erika, im glichä Jahr isch si Vater im Alter vo 68 Jahrgschtorbä. Im 59 isch d Ursi u im 61 Dori uf d Wält cho. 14 Jahr später im 75 isch Beata, 76 di Zwillingsbuebä, Daniel u David u im 79 no d Marlies geborä.

Im Jahr 70 isch dr Chnächt Häns uszogä u het ghüratä. U Godi het dr Betrieb verchlinderet, Wyssematti verpachtet, d Chüeh i dr Becki im Recketal gsümmeret u Guschti a Giesene gäh.

Im Jahr 74 isch är z Frutigä i Gmirat gwählt wordä, 8 Jahr het är das Amt usgüebt u i verschidenä Komissionä mitgwürkt. Bim Bou vo dr Wyssemattistrass het är o viel gliischtät, sigs bim Planä oder bim Landerwärb.

Ab em 94 si d Wiideni a Wyssematti umhi sälber gnutzt wordä. Daniel u David hii Früüd übercho, sälber chönä Chees z machä.

Später hi si ä schönä Bärg im Diemtigtal chönä übernäh u Godi het grossi Früüd chönnä ha, wie siner Söhn mit ihrer Familiä so schön buuret hii, u das erscht no mit schönem Simmetaler Veh.

Im Jahr 2000 het Godi e schwärä Holzerufall erlittä u het sig trotz sinä 75 Jahr sehr guet erholt. U i sinä altä Tagä o liechteri Arbitä dörfä machä. Tägligi Spaziergäng, um gsund z blibä, aber mit dr Zit si di Spaziergäng ging chli chürzer wordä. Im Summer 22 isch är ids Altersheim züglet. Am Afang het är lengi Zit kabä, aber mit dr Zit het är sig rächt guet igläbt, isch z zfridä gsi u het ging Früüd ghabä, we öpper z Bsuech isch cho. Bis är am 15. Chrischmonet im Alter vo 99 Jahr u 3 Monet für ging siner Uge zue ta het.

Wiär hi dig als fröhligä u guetmüetigä Mensch i beschter Erinnerig.