Dr Hans Stoller-Burgener isch am 17. Juli 1943 als eltischts vo vier Chind vor Marie u em Hans Stoller-Trummer a Achere gebore. Si hii ä strengi, aber schöni Chindhiit gha. Denn hii si no müesse luufe vo dahiime uf ds Hore u vo dert all Tag z Fuess i d Schuel.

Die nün Schueljahr het är im Schuelhuus Hasli verbracht. Früei het är scho dahiime ufem Burebetrieb müesse mithälfe. Bereits ab em 6. Schueljahr isch är mit Aellig Häm, wo denn im 9. Schueljahr isch gsy, zäme z Bärg im Chummi a Engstlige.

Nachem Schuelustritt het är ushilfsmässig uf verschiedene Burebetriebe gwärchet. Dr Winter dür het er bi Künzi u Steiner gwärchet u im Summer wyterhin z Bärg a Engstlige. Ir Rekruteschuel isch er bi de Train z Bellinzona gsy.

Im 1970 isch sy Vater am ne tragische Unfall gstorbe u vo denn aa het är dr elterlich Betrieb sälbstendig gfüehrt. I all dene Jahr bis zletscht isch är vo syne Brüetsche tatchräftig understützt worde. Sygs bim Heue oder Wildheue ufem Hore, bim Zügle oder bi allne andere aafallende Arbiite, was är sehr gschetzt het.
Im Jahr 1968 isch dr Hans als Gründigsmitglied vor Skilift Engstlige AG voll im Ufbuu mittätig gsi.

Künftig het är 39 Jahr lang dr Skiliftbetrieb als Betriebsliiter gfüehrt.
Glychzytig isch o ds Restaurant Berghaus Bärtschi eröffnet worde. Dert hii d Skiliftler ab u zue es Gaffi trunke u dr Hans isch denn ned ging nume wägem Gaffitrinke dert gsy. Dadrus isch när die grossi Liebi entstande.
Sys Anni het är im Januar 1971 ghürate. Churzi Zyt speter sy ihne füf Chind gschenkt worde. 1971 ds Heidi, 1972 dr Peter, 1973 d Erika, 1976 dr Hansueli u 1980 ds Vreni. Bsunders Früd hii ihm när o syner 14 Grosschind u ds Urgrosschind gmacht. Ds Familieläbe isch ihm ging sehr wichtig gsy, sy si doch 53 Jahr glücklig ghürate gsy.

Ganzi 66 Summer bis vor drü Jahr isch är mit voller Früüd, Härzbluet u Lydeschaft mit syre Familie a Engstlige z Bärg. Wo är dr Betrieb em Sohn Peter het übergäh, het er sig gfröit uf die Zyt, wo är het chöne a Engstlige blibe, ohni ging uf u ab z müesse für ga z heue u d Arbiit z mache im Tal.
Dr gröscht Tiil vo sym Läbe het är a Engstlige verbracht. Ging im Summer isch er z Bärg, u chumm achezüglet, isch er umi obe gsy für d Vorbereitige füre Skilift. Im Winter isch er ging am Lift u im Früehlig bim Abbuu drby gsy.

Obi vieler, strenger Arbiit isch er ging ruehig, überliit u humorvoll blibe. Mengisch we är öppis verzellt het, hets ned viel Wort brucht, si sy träffend gsy u me het drzue no öppis müesse überlege. Er het de Chind öppe iis grate: «Reden ist Silber, Schweigen ist Gold» oder: «Sage nicht immer alles, was du weisst, aber wisse immer, was du sagst.»

All Jahr bim Zügle mit de gschmückte Tier het me sys Härzbluet für d Tier gspürt. Sy Lydeschaft isch d Vehzucht mit Chüe u Munige gsy. Dadrby hii sig Fründschafte bildet o über d Kantonsgrenze us. So het er viel Orte u Betriebe keneglehrt, wo är miteme Usflug verbunde het. Als President vor Vehzuchtgnosseschaft Frutige 6 het er sig o mengs Jahr engagiert.

Syner Hobbys i junge Jahr sy Schiesse gsy u Singe u Theatere im Gmischte Chor Frutigland. Speter het er gärn mit syr Frou d Konzärt u Uffüehrige, wo syner Chind u Grosschind sy ufträte, bsuecht.
Mit syne Brüeder u Kollege isch er gärn a d Schwingfescht gange u i de letschte Jahr het er am Fernseh der Schwingsport lydeschaftlich verfolgt. O ds Jasse het drzue ghört, für das het er sich bis zletscht wüchentlich mit syne Kollege troffe.

Mit zuenähmendem Alter het er vermehrt mit dr Gsundhiit kämpft. Dieses Jahr im Uugschte het er sy dritt Härzinfarkt erlitte. Vo däm het er sig nemme rächt erholt u isch am 11. Oktober ruehig ygschlafe.