Ds Lina ischt am 15. Hornig 1931 a Achsete uf d Wält cho. Sächs Jahr ischt äs dr Suneschyn vo syne Eltere gsy, bis äs het Konkurrenz ubercho, äs Schweschterli, ds Elsbeth. Es ischt no iinischt sächs Jahr gange, bis äs umi es Schweschterli het ubercho, das bin ig gsy, ds Dorett. Ds Lina het mier mengischt füürgha, äs hiigi mi viel müesse wägele. Di leschte zwü Jahr han ig ihns halt due im Rollstuel gwägelet, wils netme guet ischt zfuess gsy.
Ds Lina ischt eso äs Gschyds gsy, dass äs nume acht Jahr i d Schuel het müesse. Ds Lina het chöne e Lehr uf dr Gmiindskasse mache, wo äs bis zur Pangsionierig bliben ischt. Wärend syr Lehrzyt ischt d Familie uf Frutige züglet. I junge Jahre het äs sys Läbe Jesus übergä u ischt speter Mitgründeri worde vo dr MSD.
Im 1973 het äs ir Stiinermatte es Huus la buwe u het d Eltere zue sich gno u guet zuene gugget. Og zu Elsbeths u üsne Chind ischt äs es guets gsy. Äs ischt ifach ds Tanti gsy.
Nach der Pangsionierig, d Eltere si scho gschtorbe gsy, isch äs i d Nechi vor Elsbeth züglet. Wo d Elsbeth vor 12 Jahre gschtorbe ischt, het äs e schweri Depression übercho. Mir his müesse i Psychiatrie gä. Namene Jahr het äs sich umi rächt guet erholt u ischt due i ds Hiim uf Gerlafinge zoge. Lang ischt das guet gange, bis äs ifach due dement worde ischt.
Am 25. September 2022 het äs due chöne yschlafe.