Lük isch am 23. Juni 1992 als zweitä vo dri Söhn vor Adeline u vom Daniel Germann uf d Wält cho. Scho früei het är gärn Tier gha. Er isch albä im Quartier mit sym Plastiktraktor umegfahrä u het ufem Aahenger Häsä gladä gha. Häsä het är o im Gand welä aasiedlä, aber ds Risiko vomnä Gryffvogel-Aagriff isch z gross gsy. Als Alternative het är sig über Murmeli schlaugmacht. U weri dr Tierschutz net so streng, de hettemer hüt ä Murmelizucht vo Lük im Gand.

Während dr Chindhiit het sig Lük am liebschtä mit dä beidä Brüetschä, Simel u Stef, gmässä. Dr Ehrgyz isch ging riesig gsy – bim «Rüüber u Poli»-Spielä im Quartier, bim Lüttele oder bim Schiessä vo Schneebäll ids Wohnzimmer vo dä Nachburä u speter bim Sport, bsunders miteme Racket oder bim Gokart-Fahrä. Lük het ä ereignisriichi Jugendzyt gha. Är isch als Macher-Typ ohni grossi Wort, drfür mit viel Schalk, bekannt gsy. Woner mit dä Rollerblades uberne Schanzä isch u nachemä fürchterlichä Sturz ä Ellä-Speichä-Doppelbruch drvo het zogä, ischer zum Mueti gfahrä u het ruehig gsiit: «Gugg my Arm, i tue net schouspielerä.» Dr Unterarm het ä zweitä Ellbogä drind gha, so verchrümt ischer gsy.

Nach dr Schuelzyt isch Lük dä Fuessspurä vom Vater gfolgt u het ä Lehr als Outomobilmechatroniker im Adelbode gmacht. Nachem aaschliessendä Durchdiener im Militär u ämnä Abstächer zure Garage z Thun hets ihn umi uf Frutige inä Garage zogä. Nach 5 Jahr het är ä Abwächslig gsuecht u het Nüiis welä lehrä. Drum het är im 2019 zur LEU Anlagenbau AG z Uetendorf gwächslet. Ds Zämäbouä u ds Wartä vo Chesmaschine het ihm Früüd gmacht. Är isch albä begiischteret cho verzelä, wener fürnä Inbetriebnahm nach Österrych oder Spanie het dörfä.

Im Herbst 2011 isch bi Lük ä nüii Person ufem Radar uftoucht: d Rahel Wäfler. Sie het syner Emotionä chräftig dürigschüttlet. Es Jahr speter isch sie zur wichtigschtä Person i sym Läbä wordä. Arä wunderschöne Hochzyt im Mai 2017 hii sig Lük u d Rahel ds Ja-Wort gäh. Miter Rahel het Lük sehr schöni Ehejahr dörfä erläbä. Äs Highlight isch d Riis mitem sälber umboute Büssli 2019 gsy. Sie sy denn zwe Mönet dür Europa greist u hii die intensivi gmeinsami Zyt u Aktivitäte sehr gnosse.

Afangs 2022 isch bi Lük ä schlimmi Chrankhiit usbrochä. Är het starchi Depressione übercho, het syner Sterchinä u ds Schönä am Läbä nemme chönä gseh. Er het fescht kämpft, daser umi us däm tüüfä Loch chunt u het frywillig professionelli Hilf i Aspruch gno. Leider het syni Chraft net glängt, um dä Kampf gägä die schlimmi Chrankhiit z gwinä. Am 9. September 2022 isch dr Gedanketunnel ganz fyschter wordä u het überhandgno.

Mir sy dankbar für allz Luschtigä u Tiefgründigä, wo mier mit Lük hii dörfä erläbä. Sys riisägrossä Härz u syni Atiilnahm jedem Mensch gägenüber wird üs immer bsunders fescht i Erinnerig blibä! Dür syni Tochter Amy, wo im Januar 2023 isch uf d Wält cho, dörfe mier o itz no ä sichtbarä Tiil vo ihm bi üs ha. Uf Wiederseh, liebä Lük, du blibsch für immer fescht i üsnä Härz!