Am 29. Dezember 2023 gäge Abe het ds Härz vom Peter Ingold ufghört z schla. Er isch erlöst worde vo syre lenge Chrankheit, wo ihn ging meh ygschränkt het und ihm dr Läbesmuet gno het. Di gsellige Momänt mit syre Familie und syne Fründe sy sälte worde und es het ihm d Chraft gfehlt füre Wäg i Schwand. Er, wo Usflüg ids Piemont oder ids Elsass het gnosse und so gärn mit Fründe über Wy gfachsimplet het. Er het ds Läbe vermisst, wies vorher gsy isch.

Sys Läbe, wo am 15. September 1947 als erschte Sohn vor Margaritha und em Willy Ingold Dähler aagfange het. D Nachchriegszyt hets erforderet, dass dr Vater und d Mueter füre Läbesunterhalt vor junge Familie ufcho sy und so isch dr Peterli vo syne Grossmüettere betreut worde. Gmäss em liebevoll gfüehrte Fotoalbum söll er am 15. Oktober 1947 zum erschte Mal glächlet ha und er isch dr Mittelpunkt vor Familie blibe, bis am 19. Februar 1955 dr langersehnt chlyn Brüeder Ursli uf d Wält cho isch. Em Peter isch sofort klar gsy, dass es vo jitz aa syni Ufgab wird sy, dr Chly z beschütze und er het das mit Stolz gmacht.

Dr Urs und dr Peter sy begeischtereti Chorbballer gsy bim TV Lengnau und sie hei gärn vo ihrne Abetür im wyssgrüene Triko vrzellt.

Nach dr Schuelzyt z Lengnau het dr Peter es Jahr d Handelsschuel bsuecht und isch de i syni Lehr als Bankchoufma gstartet. Us dere Zyt sy ihm Fründe blibe, woner mitne sys Läbe lang uf Episode us dr Lehrzyt u dr Jugend het chönne zruggluege. Nach dr Lehr het er syni Sprachkenntniss z Ängland mit em Freddy Neuenschwander perfektioniert und dert het er ds Lily und dr Nils us Dänemark glehrt kenne – o sie, und später ihri Chind Peter und Helle, hei ihn ufem ganze Läbeswäg begleitet.

Wichtig isch ihm o denn scho gueti Musig gsy, er het Fröid gha a de Songs vo syne Gitarrehelde Bob Dylan, Rolling Stones und Eric Clapton, vom Tom Petty, de Dire Straits und Queen. Chum sy di erschte Täkt vomene Song im Radio aagspilt worde, isch unweigerlich d Frag nachem Songtitel und em Interpret cho und so hei mier Chind outomatisch es grosses Repertoire vo «ächter» Musig uswendig glehrt. O Livekonzert sy es Highlight für ihn gsy und ds nöischte Album vo de Rolling Stones wär ganz sicher i sym CD-Player glandet.

Sy Schuelfründ Bruno hets als Lehrer ad Schuel Därstette verschlage, woner d Agathe Knutti, d Schwöschter vo dr Monika, het glehrt kenne. Amene Tanzabe am Silvester 1969 hei sech ds Moni und dr Peter verliebt und hei am 10. April 1971 ghürate. Während vier Jahr het ds junge Paar z Lengnau gläbt und isch de ufe Wunsch vor Monika im Juni 1975 uf Adelbode zoge, wo dr Peter syni Arbeit bi dr Kantonalbank het ufgnoh.

Am 15. September 1975, Peters Geburtstag, isch dr Christian gebore worde, nachhär 1979 i und 1982 dr Simon. 1983 isch d Familie ids obere Schlegeli ids Eigeheim zoge. Zu syr Fröid hei alli drü Chind Gfalle am Yshockey gfunde, emene Sport, wo ihm als Seeländer scho immer wichtig isch gsy. So het er sich als Fahrer und Betreuer für d Nachwuchsmannschafte vom EHC zur Verfüegig gstellt und het o später chum e Match verpasst, wo syni Chind bereits i Yschhalle i dr ganze Schwyz gspilt hei. Alli Chind hei ihn lang sehr eifach a sym Marggezeiche, dr rotgraue Schyjagge, uf dr Tribüni chönne erkenne.

Mit sym Vater het dr Peter vili Stund bim Fische ufem See oder a dr alte Aare verbracht. O z Adelbode isch er hüfig de Bäch na gange und het sech im Fischereiverein engagiert. Syni Familie het er mit bratene Forälle verwöhnt, obschon er sälber lieber es saftigs Stück Fleisch gha het. Am Wuchenend isch er gärn am Grill gstande oder i dr Chuchi. Er het mit Kollege Chochkürs bim Eric Forster und em Kurt Gygax bsuecht. Als Fynschmecker hed er Gfalle am passende Wy gfunde, u vo da a het er Reise ids Burgund mit Fründe unterno und gueti Tropfe gsammlet. O z Südfrankrych het er sich a früschem Fisch und Ouschtere erfröit und vieli glücklichi Stunde mit dr ganze Familie i dr Feriewohnig z Grand Mott verbracht.

Am 7. Januar 2009 isch dr Urs nach längerer Chrankheit verstorbe und dä Verluscht het schwer gwoge füre Peter. Er het sy Brueder fescht vermisst.

Dr Peter het d Filiale vor Kantonalbank z Adelbode bis zur Umstrukturierig gleitet und isch när uf Spiez versetzt worde. Obwohl er gärn im Bankwäse gschaffet het, isch er 2009 froh gsy, de viele Änderige und Entwicklige id Pensionierung z entfliehe. Jitz het er syni Energie für sy im 2005 erboute Wychäller chönne nütze und er het mit viel Ysatz Reise füre Wyclub organisiert, für ging umi nöji Gebiet u Wysorte kennezlehre. Er het jitz o meh Zyt gha zum bischpilswys für ds Heimatmuseum als Sekretär tätig z sy u für syni Familie z bewirte, wo jitz um syni Grosschind Yann, Alyssa, Noée, Léa, Natalia, Julia und Sarah aagwachse isch.

«Aussi aime-t-on deux fois, la première en réalité, la seconde en souvenir.»
«Me liebt zwöimal, ds erschte Mal ir Würklechkeit, ds zwöite Mal i dr Erinnerig», het dr Honoré de Balzac gschribe. I däm Sinn het zwar üsi Liebi füre Peter i dr Würklechkeit es Endi gfunde, jitz aber ufne zwöiti, nid weniger umfassendi Wys agfange. Und mier hoffe, dass mer die Liebi hüt mit öich chöi teile und zeige. Es isch e Troscht, dass dr Peter i üsere Erinnerig genauso e gliebte Mönsch wird sy, wie ers zu Läbzyte gsy isch.